佮你浸仝窟， 燒湯洗鬱卒。

                                                       

佮你浸仝窟， 燒湯洗鬱卒。

【作者:林沈默】

四十一度水溫，
是熱噴噴記憶、
是燒滾滾滋味、
是半世共修的鹹酸甜。



人情冷冷，
咱做伙凍過。
人事茫茫，
咱做伙拚過。
人生海海，
咱做伙泅過。
泅來到鴛鴦小溫泉，
這窟心適的靠岸。



佮你浸仝窟，
燒湯燒滑滑。
洗掉風霜、
攄掉委屈。
青春浸落去，
白煙蒸起來。
毋管酸水汗水磺水，
結結做一堆。



佮你浸仝窟，
燒湯洗鬱卒。



# 2010-02-10# 中國時報# 【作者:林沈默】

註:

台音義注：
佮（kah2）你浸仝窟（kang3-khuk4）：
與你同泡一池溫泉，暗喻夫妻同甘苦共修渡。

心適（sim-sik4），開心、愉快。

蒸（tsing3）起來：冒出來。

燒湯：指溫泉。

攄（lu3）掉：搓洗掉。攄為暫借字。

毋（m3）管：不管。

磺（hon）水：泛指溫泉湯。